ДБУ "Министрлар Кабинеты каршындагы Татарстан Республикасы Икътисади һәм социаль тикшеренүләр үзәге"

Рөстәм Миңнеханов: «Май указлары» үтәлеше өчен безнең министрлар шәхсән җаваплы

2015 елның 2 июле, пәнҗешәмбе

«Май указлары» үтәлеше өчен безнең министрлар шәхсән җаваплы. Бүген бу хакта Татарстан Республикасы Президенты вазыйфаларын вакытлыча башкаручы Рөстәм Миңнеханов Россия Федерациясе Президенты Владимир Путинның 2012 елның 7 маендагы указларын гамәлгә ашыру мәсьәләләре буенча Татарстан Республикасы Министрлар Кабинеты утырышында хәбәр итте. Чара Татарстан Республикасының барлык мунициципаль районнары белән видеоконференция режимында узды.

Анда шулай ук Татарстан Республикасы Премьер-министры Илдар Халиков, Татарстан Республикасы Президенты Аппараты җитәкчесе Әсгать Сәфәров, республика министрлыклары һәм ведомстволары җитәкчеләре катнашты.

Утырышта катнашучыларга мөрәҗәгать итеп, Рөстәм Миңнеханов билгеләп үткәнчә, «май указларында» хакимият структуралары эшенең төп юнәлешләре чагылган. Аларга бөтен илебез халкын борчучы мәсьәләләр кертелгән, диде ул.

Рөстәм Миңнеханов эшсезлеккә каршы көрәшне мөһим мәсьәлә дип атады. Бүген Татарстан Республикасы Хөкүмәте өстәмә эш урыннары булдыру буенча чаралар комплексын эшли. Халыкны эшкә урнаштыруда бизнес-сектор да ярдәм итә ала, дип саный Рөстәм Миңнеханов. «Технопарклар, махсус икътисадый зоналар һәм бизнес-инкубаторлар оештыру – болар барысы да бизнеска ярдәм итәр өчен һәм ул үз эшен тизрәк башлап җибәрә алсын өчен», - дип белдерде ул.

Татарстан Республикасы Президенты вазыйфаларын вакытлыча башкаручы Рөстәм Миңнеханов хәбәр иткәнчә, хезмәт җитештерүчәнлеген арттыру өчен республиканың ике юнәлеше бар. Беренчесе – тора-бара йөкләнешне арттырып, оптимальләштерү. Икенчесе - экспансия, яңа базарлар эзләү, киләчәктә хезмәт нәтиҗәлелеген арттырып, җитештерүләр күләмнәрен күбәйтү. «Барлык бу чаралар тормыш эшчәнлеге өчен кирәк. Түбән хезмәт җитештерүчәнлеге һәрвакыт банкротлыкка китерә», - диде Рөстәм Миңнеханов.

Татарстан Республикасы Президенты вазыйфаларын вакытлыча башкаручы сәламәтлек саклау өлкәсенә аерым игътибар бирергә кушты. Бу беренче чиратта тормыш сыйфаты мәсьәләләре, диде ул. «Бүген хезмәт яшендәге бик күп кеше үлә. Асылда диспансеризация булмаганнан, тиешле медицина ярдәме юк, - диде ул. – Беренчел медицина звеносы мәсьәләсен хәл итәргә кирәк. ФАПларны төзеп кенә калмаска, аларга белгечләрне эшкә урнаштырырга да кирәк».

Рөстәм Миңнеханов торак мәсьәләсенә аерым тукталды. Тузган торак һәм авария хәлендәге торак мәсьәләсе – Россиядә төп мәсьәләләрнең берсе, диде ул. Рөстәм Миңнеханов фикеренчә, акча һәм ресурслар булмау бу мәсьәләне хәл итүгә комачауламаска тиеш.

«Без бу бурычны үтәр өчен теләсә нинди мөмкинлекләр табарга тиеш. Авария хәлендәге торак буенча безнең карарны төрлечә бәяләргә мөмкин. Әмма бу – без тәкъдим итә алырлык бердәнбер дөрес юл. Бәлки, ул кайбер кешеләр фикеренә туры килмидер. Әмма бу безнең карар һәм бары тик Татарстан гына моны эшли ала», - дип белдерде Татарстан Республикасы Президенты вазыйфаларын вакытлыча башкаручы.

Рөстәм Миңнеханов искәрткәнчә, республикада Татарстан Республикасы Президенты каршындагы Дәүләт торак фонды эшләп килә, аның аша авария хәлендәге торакта яшәүчеләр өчен яңа фатирлар төзелә. «Яңа торакны файдалануга тапшырырга кирәк. Һәм ул күпләр өчен мөмкин булырга тиеш. Алып булмаган торак беркемгә дә кирәкми», - диде Рөстәм Миңнеханов.

Демография мәсьәләләрен хәл иткәндә яшь гаиләләр өчен гарантияләр булдырырга кирәк, дип дәвам итте Татарстан Республикасы Президенты вазыйфаларын вакытлыча башкаручы, Балалар бакчалары, мәктәпләр ачарга. «Без күп кенә бакчаларның хәзерге нормаларга һәм таләпләргә туры килмәвен беләбез. Әмма бу мәсьәләне тиз генә хәл итә алмыйбыз, - дип билгеләп үтте Рөстәм Миңнеханов. - 2008 елдан алып 2015 елга кадәр без күп фатирлы йортларның 2/3сен ремонтладык. Өч ел эчендә 500ләп мәктәпне торгыздык. Безнең бурыч – боларны хәл иткәндә төгәл аңлаешлы системалы алымнар булдыру».

Шулай ук Рөстәм Миңнеханов Россия Федерациясе Президенты указларында булмаган мәсьәләләрне дә күтәрде – күп балалы гаиләләргә җир кишәрлекләре бирү программасын гамәлгә ашыру. Рөстәм Миңнеханов билгеләп үткәнчә, бүген бу эш яртылаш кына башкарылган: гаиләләргә җирләр бирелгән, әмма кирәкле коммуникацияләрсез генә. Татарстан Республикасы Президенты вазыйфаларын вакытлыча башкаручы муниципалитетлар башлыкларына тормыш өчен кирәкле шартлар булган урыннардан гына җирләр бирергә кушты.

«Без яхшы эш эшләдек, җир бирдек, аннары бар да тукталып кала. Бернинди инфраструктурасы булмаган килеш, ничек бу җир кишәрлекләрен үзләштерергә? Трансформатор куегыз, су үткәрегез, вак таштан юл салыгыз. Ул бит безнең кешеләр! Үз вазыйфаларыгызны үтәгез: спонсорларны җәлеп итегез, программалар буенча эшләгез», - диде Рөстәм Миңнеханов.

Азактан Рөстәм Миңнеханов билгеләп үткәнчә, «Май указлары» үтәлеше өчен безнең министрлар шәхсән җаваплы. Указларны гамәлгә ашыру – хакимият вәкилләре эшенең төп критерие, дип белдерде ул.

Аннары нотыклар белән Татарстан Республикасы Премье-министры урынбасары – мәгариф һәм фән министры Энгель Фәттахов, Татарстан Республикасы икътисад министры Артем Здунов, Татарстан Республикасы Хезмәт, эш белән тәэмин итү һәм социаль яклау министры Эльмира Зарипова, Татарстан Республикасы мәдәният министры Айрат Сибәгатуллин, Татарстан Республикасы төзелеш, архитектура һәм ТКХ министры Ирек Фәйзуллин чыгыш ясады.

ТР Президенты Матбугат хезмәте

БАРЛЫК ЯҢАЛЫКЛАРНЫ УКУ

СОҢГЫ ЯҢАЛЫКЛАР

апрель, 2026 ел

Социаль объектларны цифрлы мониторинглау һәм диспетчерлаштыру системасын презентацияләү

2026 елның 8 апрелендә «ТР Икътисади һәм социаль тикшеренүләр үзәге» ДБУда директор А. Н.Кудрявцева җитәкчелегендә эшлекле киңәшмә узды, анда «Татарстан Республикасы процесслары белән идарә итү үзәге» ҖЧҖ генераль директоры Т.Р. Закиров социаль объектларны цифрлы мониторинглау һәм диспетчерлаштыру системасын күрсәтте. Нотыкчы хәбәр иткәнчә, система үзәкләштерелгән контроль һәм биналарның инженер системалары белән идарә итүгә, шулай ук штаттан тыш хәлләргә оператив җавап бирүгә юнәлдерелгән техник һәм программалы чишелешләр комплексыннан гыйбарәт. Система инженерлык системаларының эш параметрларын (температура, басым, көчәнеш, датчиклар эшләү, аварияләр) реаль вакытта терки. Мондый системалар мәктәпләрдә, хастаханәләрдә, спорт һәм мәдәният учреждениеләрендә, шулай ук башка социаль объектларда кулланыла. Презентация йомгаклары буенча докладчыга сораулар бирелде һәм системаның эше турында фикер алыштылар. Киңәшмә эшендә Татарстан Республикасы төзелеш, архитектура һәм торак-коммуналь хуҗалык министры урынбасары Абүбәкерова Э. Х. катнашты. «ТР Икътисади һәм социаль тикшеренүләр үзәге» ДБУдан директор урынбасары Гайзатуллина Ч.Н., учреждениеләрнең мәгълүматлар базасын администрирование бүлеге башлыгы Газетдинова Н.Р., социаль программалаштыру бүлеге башлыгы Грызунова Е. С., макроикътисадый анализ отелы башлыгы Баһаутдинова Е.В., челтәр технологияләре бүлеге башлыгы Кудрявцев Д. А., мәгълүмати технологияләр бүлеге башлыгы Макаров А.М., шулай ук «ТР Икътисади һәм социаль тикшеренүләр үзәге» ДБУ тармак бүлекләре белгечләре катнаштылар.

апрель, 2026 ел

Татарстан Республикасы муниципаль берәмлекләре катнашында Татарстан Республикасы икътисадының тотрыклы үсешен тәэмин итү буенча эш төркеме утырышы

2026 елның 6 апрелендә Татарстан Республикасы Икътисад министрлыгында Татарстан Республикасы Премьер-министры урынбасары – Татарстан Республикасы икътисад министры М.Р.Шаһиәхмәтов җитәкчелегендә видеоконференцэлемтә режимында Татарстан Республикасы икътисадының тотрыклы үсешен тәэмин итү буенча чараларның республика планын гамәлгә ашыру буенча эш төркеменең чираттагы утырышы булды. Утырышта министрлыклар, ведомстволар, федераль хакимият органнарының территориаль органнары, Татарстан Республикасы Муниципаль берәмлекләре вәкилләре катнашты. Утырыш кысаларында түбәндәге мәсьәләләр каралды һәм фикер алышынды: Татарстан Республикасы бизнесын салым законнары үзгәрешләренә яраклаштыру буенча Татарстан Республикасы муниципаль берәмлекләре эше турында. Җитештерү (хезмәт күрсәтүләр) күләмен киметеп, предприятиеләрнең республика маркетинг үзәге платформасында эшләү турында. Татарстан Республикасы муниципаль берәмлекләренең бердәм килештерүләр Кабинетында агымдагы эш статусы турында. Хезмәт базарындагы вәзгыять, Татарстан Республикасы предприятиеләре һәм оешмаларының кадрлар ихтыяҗын фаразлау һәм максатчан укыту механизмнары турында. «ТР Икътисади һәм социаль тикшеренүләр үзәге» ДБУдан утырыш эшендә икътисадый планлаштыру һәм программалаштыру бүлеге башлыгы И. Р. Гаязов катнашты.

апрель, 2026 ел

«ТР Икътисади һәм социаль тикшеренүләр үзәге " ДБУ фәнни-координацион советы каршындагы семинар утырышы

2026 елның 3 апрелендә директор А.Н. Кудрявцева рәислегендә «ТР Икътисади һәм социаль тикшеренүләр үзәге» ДБУ фәнни-координацион советы каршында даими эшләүче семинарның чираттагы утырышы булды. Утырыш барышында түбәндәге темалар буенча хәбәрләр тыңланды һәм фикер алышынды: Идарәнең квалификация күтәрү мәгариф программалары һәм технологияләре бүлегенең 2025 елдагы эш йомгаклары һәм 2026 елга бурычлары турында. Докладчы-директор урынбасары А. Б. Гревцов. Салым реформасының халыкның тормыш дәрәҗәсенә (шул исәптән торак-коммуналь хуҗалык хезмәтләре, куллану товарлары, медицина хезмәтләре өчен түләүгә) йогынтысын бәяләү буенча аналитик модельне тәкъдир итү. Докладчы-макроикътисадый анализ бүлегенең әйдәүче белгече Назаров Р. А. Утырыш эшендә «ТР Икътисади һәм социаль тикшеренүләр Үзәге» ДБУнең фәнни-координацион советы әгъзалары, шулай ук «ТР Икътисади һәм социаль тикшеренүләр Үзәге» ДБУнең кызыксынучы хезмәткәрләре видеоконференцэлемтә режимында катнашты.

март, 2026 ел

Легаль булмаган мәшгульлеккә каршы көрәш буенча Республика ведомствоара комиссиясенең һәм хезмәт хакы буенча срогы чыккан бурычларны формалаштыруга каршы көрәш буенча Республика ведомствоара комиссиясенең уртак утырышы

2026 елның 27 мартында Татарстан Республикасы хезмәт, халыкны эш белән тәэмин итү һәм социаль яклау министрлыгында Татарстан Республикасы хезмәт, халыкны эш белән тәэмин итү һәм социаль яклау министрының беренче урынбасары Р.Ф.Вәлиуллов рәислегендә легаль булмаган эш белән тәэмин итүгә каршы тору буенча республика ведомствоара комиссиясенең һәм хезмәт хакы буенча срогы чыккан бурычларны формалаштыруга каршы тору буенча республика ведомствоара комиссиясенең уртак утырышы булды. Утырышта хезмәт хакы буенча бурычларны түләүне тәэмин итү, рәсми булмаган мәшгульлекне киметү, хезмәт хакының билгеләнгән минималь күләменнән түбән булмаган дәрәҗәсен тәэмин итү мәсьәләләре каралды. «ТР Икътисади һәм социаль тикшеренүләр үзәге» ДБУдан видеоконференцэлемтә режимында утырыш эшендә директор урынбасары А.Б. Гревцов һәм социология бүлеге башлыгы Л. Ф. Казанцева катнаштылар.

ЯҢАЛЫКЛАРГА ЯЗЫЛУ