ЯҢАЛЫКЛАР
Татарстан Республикасы Премьер-министры И.Ш.Халиков җитәкчелегендә торак-коммуналь хуҗалыгы өлкәсендә күрсәтелә торган хезмәтнең сыйфатын яхшырту сорауларына караган видеоконференция булып узды.
Төп доклад белән Татарстан Республикасы төзелеш, архитектура һәм торак-коммуналь хуҗалык министрының беренче урынбасары А.М.Фролов чыгыш ясады.
Җыелыш эшендә ДБУ “Икътисади һәм социаль тикшеренүләр Үзәге”нең диреткоры А.Н.Кудрявцева катнашты.
Бүген ТР Дәүләт Советының 14 нче утырышында “2015 нче елга һәм 2016, 2017 нче еллар планлы чорына ТР бюджеты турында” ТР законына үзгәрешләр кертү турында”гы ТР закон проекты каралды. Бу мәсьәлә буенча ТР финанслар министры Радик Гайзатуллин чыгыш ясады. Өстәмә доклад белән, шулай ук, Бюджет, салымнар һәм финанслар комитеты рәисе Леонид Якунин чыкты.
ТР Хөкүмәте йортында уздырылган ТР Министрлар Кабинеты утырышында төзелеш һәм объектларны капиталь төзекләндерү буенча 2015 ел йомгаклары һәм 2016 елга бурычлар каралды. Утырышта ТР Президенты Рөстәм Миңнеханов, ТР Премьер-министры Илдар Халиков, Дәүләт корпорациясе – Торак-коммуналь хуҗалыкны реформалаштыруга ярдәм фондының күзәтчелек советы рәисе Сергей Степашин, әлеге фондның генераль директоры Константин Цицин, Татарстан Республикасы төзелеш, архитектура һәм ТКХ министры Ирек Фәйзуллин катнашты.
Төп доклад белән ТР төзелеш, архитектура һәм торак-коммуналь хуҗалык министры Ирек Фәйзуллин чыгыш ясады. Ул торак төзелешенең мөһим юнәлешләрдән булуына игътибар юнәлтеп, 2010 елдан бирле Татарстанда ел саен 2 млн 400 мең кв м торак гамәлгә кертелүен һәм моның дәүләт торак программалары кысаларында башкарылуын искәртеп үтте. Аның сүзләренчә, әлеге программалар шулай ук коммерцияле һәм шәхси торак төзелешен үстерүгә ярдәм итә. Нәтиҗәдә, 1 кешегә торак белән тәэмин ителеш күрсәткече арта – республикада бу сан 0,62 кв м тәшкил итә. Министр күп фатирлы йортларны капиталь төзекләндерү программасына аерым тукталып, аны гамәлгә ашыру нәтиҗәсендә, Татарстанда 2 млн 800 мең кешенең торак шартлары яхшырды, дип билгеләп узды. Ул китергән мәгълүматларга караганда, быел республиканың 42 муниципаль берәмлегендә күп фатирлы 1 мең 29 фатир капиталь төзекләндерелгән. Бу максатларга 4,73 млрд сум акча бүлеп бирелгән. Киләсе елга финанслау күләме дә шул дәрәҗәдә кала һәм 4,62 млрд сум тәшкил итәчәк. Татарстанның 41 муниципаль берәмлегендә күп фатирлы 815 йортны рәткә китерү күздә тотыла. Ирек Фәйзуллин сүзләренчә, соңгы 8 елда программаны финанслау күләме 43 млрд 682 млн сум тәшкил иткән. Бүген республикада күп фатирлы 15 мең 454 йортның 15 мең 54ендә яшәүчеләр (97,4%) төбәк операторы хисабына акча тупласа, 400 йортта яшәүчеләр (2,6%) акчаларын махсус хисапка салып бара.
ТР Президенты Рөстәм Миңнеханов билгеләп узганча, Татарстанның капиталь төзекләндерү юнәлешендәге уңышлары сизелерлек, чөнки бүген бу юнәлештә эш билгеле бер дәрәҗәдә җайга салынган. Шул ук вакытта ул авария хәлендәге торак мәсьәләсенең шактый катлаулы булуына игътибарны юнәлтте. Аның фикеренчә, бу юнәлештә кабул ителгән карарлар уйланылмаган, норматив база белән ныгытылмаган.
Рөстәм Миңнеханов бу мәсьәләне хәл итү юлы буларак Татарстанда эксперимент рәвешендә гамәлгә ашырыла торган арендалы торак яки тузган торакны социаль ипотека шартларында алмаштыруны аерып күрсәтте.
Кешеләрне, без сезгә бушлай торак бирәчәкбез, дип алдарга кирәкми. Илдә аның кадәр акча юк. Бүгенге икътисади вазгыятьне исәпкә алсак, бу бөтенләй мөмкин түгел. Без авария хәлендәге торак буенча җаваплылыгыбызны аңлыйбыз һәм бу юнәлештә үз формабызны тәкъдим итәргә әзер. Ул реаль, тормышчан”, – дип ассызыклады ТР Президенты.
Утырыш эшендә ДБУ “Икътисади һәм социаль тикшеренүләр Үзәге” директоры А. Н. Кудрявцева катнашты.
ТР Министрлар Кабинеты каршындагы Икътисадый совет әгъзалары Татарстан предприятиеләренең финанс тотрыклылыгы мәсьәләләре турында сөйләштеләр. Утырыш Татарстан Республикасы Президенты Рөстәм Миңнеханов җитәкчелегендә республиканың бөтен муниципаль берәмлекләре белән видеоконферецэлемтә режимында үтте. Утырыш эшендә шулай ук Татарстан Премьер-министры Илдар Халиков, республика министрлыклары һәм ведомстволары, күзәтчелек органнары, ТР предприятиеләре җитәкчеләре катнашты.
Рөстәм Миңнеханов ассызыклаганча, бүген предприятиеләрнең финанс нәтиҗәлелегенә бюджет керемнәре бәйле, ә алар, үз чиратында, дәүләт проектлары һәм программаларын гамәлгә ашыруны, РФ Президентының "май указларын" башкаруны, дәүләтнең социаль бурычларын үтәүне тәэмин итәләр.
ТР Президенты билгеләгәнчә, табышка салым - республиканың берләштерелгән бюджетына керемнәрнең төп чыганагы. "Агымдагы елда ул берләштерелгән бюджетның үз керемнәренең 34 % тәэмин итә. Шул ук вакытта бу елның 10 аенда Татарстан предприятиеләренең 24 % зыянга эшли. Әлбәттә, бүгенге җитди икътисадый вәзгыять шартларында предприятиеләрнең финанс нәтиҗәләре һәм салымга түләүләренең кимүенә реаль сәбәпләр бар", - дип саный Рөстәм Миңнеханов.
Аның сүзләренчә, күбесенчә бу тышкы факторларга бәйле: нефть базарында бәяләр кимү, ике яклы санкцияләр кертү, фонд базарларында катлаулы вәзгыять һәм валюта курслары үзгәреп тору - болар барысы да предприятиеләрнең икътисадый күрсәткечләренә тәэсир итә.
"Әлеге шартларда республика министрлыклары каршында эшләүче тармак баланс комиссияләренең нәтиҗәле эшчәнлеге мөһим. Хакимият органнары һәм, беренче чиратта, тармак министрлыклары даими компетентлы анализ үткәрергә һәм аларга мөмкин булган ярдәм күрсәтергә тиеш, - дип билгеләде Татарстан Президенты. - Баланс комиссияләре эше кысаларында продукция базарларындагы вәзгыять буенча консультацияләр уздырырга, икътисадый коньюктурада үзгәрешләр турында хәбәр итәргә, гамәлдәге дәүләт программалары буенча дәүләт ярдәмен алуда ярдәм итәргә кирәк".
Закон бозуны ачыклаган очракта күзәтчелек органнарына тиз арада хәбәр итү кирәк, беренче чиратта, салым инспекциясенә, диде Рөстәм Миңнеханов.
Аның сүзләренчә, эшне төгәл башкару мөһим, ә бу бөртен җирдә дә бүгенге көндә тиешенчә оештырылмаган. "Бизнесның финанс җитешсезлеген алдан билгеләү буенча системалы эшне тәэмин итәргә кирәк. ТР Финанслар министрлыгы, ТР Икътисад министрлыгы, республиканың салым органнарына тармак министрлыклары белән квартал саен зыянга эшләүләре теркәлгән һәм керемнәре кимегән предприятиеләр буенча һәм бүгенге көндә куркынычлык чигендә булганнар буенча баланс комиссияләр утырышларын үткәрергә кирәк. Әлеге эшкә предприятиеләрнең икътисадый хезмәтләре һәм финанс аудиторлар актив рәвештә кушылырга тиешләр", - диде ТР Президенты.
Ул ассызыклаганча, федераль реестр мәгълъматлары буенча Татарстанда 70тән артык аудитор компанияләр теркәлгән. Аларның функцияләре - бизнесны алып бару буенча төгәл мәгълүматлар бирү, финанс хисапларын объектив бәяләү. Рөстәм Миңнеханов әлеге өлкәдә дә сораулар булганына игътибар итте. "Кызганчыка каршы, кайвакыт аудиторларның хаклыгы һәм компетентлыгы да гел-гел булмый. Һәм закон чыгару да камиллекне таләп итә. ТР Икътисад министрлыгына Росфиннадзорның ТР да территориаль идарәсе һәм аудиторлар бергәлеге белән әлеге сорауларга өзлексез игътибарда тотарга кирәк", - дип йөкләде Татарстан Президенты.
Шуннан Татарстанда агымдагы социаль-икътисадый вәзгыять турында ТР буенча Федераль дәүләт статистикасы хезмәте җитәкчесе Валерий Кандилов хәбәр итте.
Предприятиеләрнең финанс торыклылыгы турында ТР икътисад министры Артем Здунов докладында әйтеп үтте.
Шулай ук утырыш барышында ТР буенча Федераль салым хезмәте идарәсе җитәкчесе Марат Сәфиуллин, Финанс-бюджет күзәтчелеге федераль хезмәтенең ТРда территориаль идарәсе җитәкчесе Әминә Хөсәенова һәм "ФБК Поволжье" аудитор-консалтинг компаниясе генераль директоры Сергей Никифоров чыгыш ясадылар.
9 нчы декабрьдә Казанда IT-паркта коррупциягә каршы дискуссион клуб утырышы уздырылды. Анда ТР Дәүләт Советы Рәисе Фәрит Мөхәммәтшин ТР Президентының Коррупциягә каршы тору сәясәте идарәсе башлыгы Марс Бәдретдинов, ТР Җәмәгать палатасы рәисе Анатолий Фомин, ТР парламенты депутаталары, республика министрлыклары һәм ведомстволары җитәкчеләре, яшьләр иҗтимагый оешмалары, сәнәгать предприятиеләре, кече һәм урта бизнес вәкилләре, югары уку йортлары ректорлары һ.б. катнашты.
“Коррупция төрле, әмма аның көнкүреш өлкәсендә очрый торганы халыкка тәэсир дәрәҗәсе ягыннан иң авыры, – дип билгеләп узды Фәрит Мөхәммәтшин. Ул соңгы социологик сораштырулар нәтиҗәләренә мөрәҗәгать итеп, коррупциянең юхиди, медицина, военкомат, полиция кебек өлкәләрдә аеруча еш очравын әйтте.
Быел Татарстанда ришвәт күләме уртача 70 мең сум тәшкил иткән, бу, узган ел белән чагыштырганда, 32,7 процентка кимрәк.
Утырышта кече һәм урта бизнес, иҗтимагый оешмалар вәкилләре көн кадагына куелган мәсьәлә уңаеннан фикерләре, министрлыклар һәм ведомстволар, предприятиеләр җитәкчеләре киңәш-тәкъдимнәре белән уртаклашты.
Аерым алганда, республиканың кече һәм урта бизнес предприятиеләре ассоциациясе вице-президенты Роберт Закиров ришвәтчелекнең төзелеш тармагында аеруча “чәчәк атуына” игътибар юнәлтеп, еш кына корылмаларны төзүгә киткән акча кәгазьдә күрсәтелгәннән берничә тапкырга азрак була, дип фаш итте һәм төзелеш, шулай ук торак-коммуналь хуҗалык, юллар төзү өлкәләрендә коррупциягә каршы тору буенча аерым закон актлары кабул итү тәкъдиме белән чыкты.
Утырышта катнашкан фермерлар, шәхси хуҗалык башлыклары әлеге афәтнең авыл хуҗалыгы тармагында чагылыш табуына аяныч белдереп, муниципаль дәрәҗәдә җир алу шактый зур проблема, дип зарланды. Шулай ук халыктан пай җирләрен арендага алган эре оешмалардан аренда бәясен җитәрлек дәрәҗәдә түләттерү зарурияте турында да сүз булды.
“Коррупциягә каршы көрәштә хакимият белән җәмгыять берсе алдында берсе ачык, намуслы булып бергәләп эшләгәндә генә уңышка ирешеп була”, – дип сүзен йомгаклады Ф. Мөхәммәтшин.
ДБУ “Икътисади һәм социаль тикшеренүләр Үзәге” белән Саха Республикасының стратегик тикшеренүләр Үзәге арасында булган озак сроклы мөнәсәбәтләр турындагы килешү кысаларында Саха Республикасының вәкилләре белән чираттагы очрашу булып узды.
ДБУ “Икътисади һәм социаль тикшеренүләр Үзәге” директоры Алевтина Николаевна Кудрявцева Үзәкнең яңа тикшеренүләре, дәүләт һәм муниципаль идарә итү системасының эффективлыгын күтәрү өлкәсендә булган яңалыклар турында сойләде.
Очрашу вакытында ике як тәҗрибә белән алмашынды һәм киләчәктә нәтиҗәле хезмәттәшлек турында килешү кабул ителде.
Татарстан Республикасы Министрлар Кабинеты утырышын бүген Татарстан Республикасы Премьер-министры Илдар Халиков уздырды.
Утырыш РФ Президентының 2012 нче елның 7 нче маендагы “Дәүләт идарәсе системасын камилләштерүнең төп юнәлешләре турында” Указы күрсәткеченә ирешү өчен дәүләт, муниципаль һәм социаль әһәмияткә ия хезмәтләрне электрон рәвешкә күчерү буенча чаралар планын раслауга багышланган иде.
ТР Премьер-министры урынбасары – ТР мәгълүматлаштыру һәм элемтә министры Роман Шәйхетдинов утырыш барышында төп докладны ясаганда, Татарстанда хезмәт күрсәтүләрне электрон рәвешкә күчерү 2010 елдан бирле бара, дип искә төшерде. Бүген Татарстан дәүләт хезмәт күрсәтү порталы ярдәмендә 220дән артык хезмәт күрсәтелә.
Роман Шәйхетдинов хезмәтләрне электрон рәвешкә күчерүнең яңартылган планын тәкъдим итте. Барлыгы 35 хезмәт күчереләчәк. Шуларның 13 электрон рәвешкә беренче тапкыр күчерелә, 22се яңартылачак, дип хәбәр итте ул. Хезмәтләрне электрон рәвешкә күчерүдә тугыз министрлык җаваплы булачак.
“Электрон хезмәтләр гражданнарның тормыш сыйфатларын күтәрүдә кирәкле чара булып тора, аларның дәүләт белән аралашуында уңайлыкларны арттыру, хакимият органнарына барып йөрү санын кыскарту, коррупция куркынычын киметү мөмкинлеген бирә”, - диде мәгълүматлаштыру һәм элемтә министры.
Илдар Халиков Татарстанның мәгълүматлаштыру өлкәсендә үткән юлы яхшы нәтиҗәләр бирүен, халык тарафыннан уңай кабул ителүен билгеләде. “Хезмәтләрне электрон рәвештә күрсәтү аларның үтемлелеген арттыра, финанс һәм вакыт чыгымнарын киметә. Бүгенге көндә ТР дәүләт хезмәтләре порталында 220 дән артык хезмәт һәм сервис бар. Агымдагы елның 10 аенда гражданнарга 46 млн. хезмәт күрсәтелгән. Бу сан белән федерациянең теләсә кайсы субъекты горурлана ала. Әмма бүген безнең алда яңа бурычлар, яңа мәсьәләләр һәм яңа таләпләр тора”, - диде ул.
Җыелышта ДБУ “Икътисади һәм социаль тикшеренүләр Үзәге”нең директор урынбасары Ч.Н.Гайзатуллина катнашты.
ДБУ “Икътисади һәм социаль тикшеренүләр Үзәге”ндә Фәнни-координацион советының чиратагы утырышы узды.
ДБУ “Икътисади һәм социаль тикшеренүләр Үзәге” кысаларында Ситуацион үзәк моделе буенча презентациясе белән макроикътисади анализ бүлегенең мөдире Е.В.Багаутдинова һәм челтәрләр технологиясе бүлегенең мөдире Д.А.Кудрявцев чыгыш ясадылар.
Функциональ анализ һәм инновацион сәясәт бүлегенең мөдире Р.И.Уразаев инновацион инфраструктура турында сөйләде.
Россиядә һәм Татарстан Республикасында законнар чыгару өлкәсендә булган соңгы яңалыкларны региональ сәясәт бүлегенең әйдәүче белгече Зарипова А.В. китерде.
ТР Дәүләт Советының унөченче утырышында 2016 нчы елга Татарстан бюджеты проекты, кертелгән төзәтмәләрне исәпкә алып, икенче һәм өченче укылышта кабул ителде. Барлык төп республика программалары буенча финанслау тулы күләмдә сакланды. 2016 елга ТР бюджет дефициты– 5,8 млрд сум, кереме күләме 158,9 млрд сум күләмендә, чыгымнар - 164,7 млрд сум күләме белән кабул ителде.
“Быел саллы эш башкарылды. Бюджет гади түгел. Әле аңа берничә тапкыр кире кайтырбыз. Акча кысан булганда шактый авыр. Проблемалар аз түгел. Киләсе ел бюджеты безне экономияле режимда яшәргә, акчаны тиененә кадәр бәракәтле тотарга мәҗбүр итәчәк”, - дип тәмамлады Фәрит Мөхәммәтшин чыгышын.
Татарстан Республикасының Икътисади киңәшмә утырышына әзерләнү буенча Икътисад министрлыгында җыелыш булып узды.
Җыелышта ДБУ “Икътисади һәм социаль тикшеренүләр Үзәге”нең директоры А.Н.Кудрявцева катнашты.