Икътисадның конкурентлылык сәләтен үстерү факторы буларак сәнәгатьне цифрлаштыруга багышланган Татарстан Республикасы Хөкүмәте утырышы
2021 елның 21 сентябрендә «Казан-Экспо» мәйданчыгында Татарстан Республикасы Президенты Р.Н.Миңнеханов катнашында Татарстан Республикасы Хөкүмәте утырышы узды.
Үз чыгышында Татарстан Республикасы Премьер-министры А.В. Песошин билгеләп үткәнчә, әлеге утырыш сәнәгать һәм энергетика предприятиеләрен цифрлы трансформацияләүнең актуаль мәсьәләләренә багышланган. Ул республика икътисадының конкуренциягә сәләтлелеген арттыруның төп факторы булып тора. Ул шулай ук ассызыклаганча, республикада предприятиеләрне цифрлы трансформация белән нәтиҗәле тәэмин итү өчен, тармак үзенчәлеген исәпкә алып, төбәк һәм муниципаль дәрәҗәләрдә комплекслы һәм эзлекле чаралар күрергә кирәк. Ул ассызыклаганча, «сәнәгать тармакларын цифрлы трансформацияләү предприятиеләрнең үзләре һәм хезмәткәрләрнең тиешле компетенцияләреннән башка мөмкин түгел».
Предприятиеләрне цифрлаштыру һәм Татарстан Республикасы предприятиеләренең цифрлы трансформациягә әзерлеген тикшерү нәтиҗәләре турында профильле компанияләр вәкилләре чыгыш ясады.
Татарстан Республикасы Президенты Р.Н.Миңнеханов йомгаклау сүзендә сәнәгатьне цифрлаштыру – бөтен кеше өчен дә актуаль тема, дип билгеләп үтте: «Әгәр дә хакимият органнарында цифрлаштыру өлкәсендә эш системалы рәвештә алып барыла икән, күп кенә предприятиеләр – әле юл башында гына».